"Tasweer Zahan Main Nahi Tarey Jaal Ki"A Beautiful Urdu Ghazal By Allama Semab Akbar Abadi

تصویر ذہن میں نہیں تیرے جمال کی

آباد ہو کے لُٹ گئی دُنیا خیال کی

دامن کشِ حواس ہے وحشت خیال کی

کتنی جُنوں اثر ہے بہار اب کے سال کی

 میں صُورتِ چراغ جَلا اور بُجھ گیا

لایا تھا عمر مانگ کے شامِ وصال کی

 یوں طُورکو جَلا دِیا برقِ جمال نے

پتّھر میں رہ نہ جائے تَجلّی جمال کی

 پہلے خیال، خواب سے تھا طالبِ سُکوں

اب خواب ڈھونڈتا ہے پناہیں خیال کی

موسیٰ کو لاؤ، طور پر آ جاؤ دیکھ لو

اب بھی یہیں کہیں ہے تجلّی جمال کی

جلوَت میں ہُوں، تو شاکیِ ہنگامۂ ہجُوم

خلوَت میں ہُوں، تو ساتھ ہے دُنیا خیال کی

 تاریک تھی رہِ طَلب، آزردہ تھے کلِیم

بجلی نے آ کے شمع جلادی جمال کی

 چھوڑ آئی لامکاں کو بھی پیچھے تِری تلاش

اپنی حدوں سے بڑھ گئی وُسعَت خیال کی

 سیماب، یہ شباب، یہ ابر، اور یہ بہار

انگڑائیاں ہیں یہ صرف نشاطِ خیال کی

"Jo Tha Bartawo Dunya Ka Wahi Us Nay Kia Mujh Say"A Beautiful Urdu Ghazal By Allama Semab Akbar Abadi

جو تھا برتاؤ دنیا کا، وہی اُس نے کیا مجھ سے

میں دنیا سے انوکھا تھا کہ وہ کرتا وفا مجھ سے؟

ہوئی ہے آئینہ خانے میں کیا ایسی خطا مجھ سے

کہ تیرا عکس بھی ہے آج شرمایا ہوا مجھ سے

تپِ فرقت کا شاید کچھ مداوا ہونے والا ہے

کہ اب خود پوچھتے ہیں چارہ گر میری دوا مجھ سے

مرے پہلو میں دل رکھ کر مجھے قسمت نے لٹوایا

نہ میرے پاس دل ہوتا نہ کوئی مانگتا مجھ سے

جلا کر اے مذاقِ دید تو نے خاک کر ڈالا

جمالِ یار کا اب پوچھتا کیا ہے مزا مجھ سے

شبِ غم مجھ پہ جو گذری تھی میں اس سے نہ واقف تھا

چراغِ صبح نے شب بھر کا قصہ کہہ دیا مجھ سے

"Main Dewana Hun Marey Pas Mahshar Main Khara Rahna"A Beautiful Urdu Ghazal By Allama Semab Akbar Abadi

میں دیوانہ ہوں میرے پاس محشر میں کھڑے رہنا

نہ جانے میں کہوں کیا اور کیا پوچھے خدا مجھ سے

تو کیا اپنی سزائے قتل پر خود دستخط کر دوں؟

وہ لکھواتے ہیں کیوں جرمِ وفا کا فیصلہ مجھ سے

غلط تھی یہ مَثَل سب دبنے والے کو دباتے ہیں

دبا میں خاک میں، تو خاک کو دبنا پڑا مجھ سے

یہ میری حیرتِ دیدار کا انجام ہونا ہے

نہ تم جلوہ دکھاؤ گے نہ دیکھا جائے گا مجھ سے

بتا او میرے غارت گر، اب ان کو کیا بتاؤں میں؟

مسافر پوچھتے ہیں تیری منزل کا پتا مجھ سے

سنے کس کس کی وہ سیماب کس کس کو تسلی دے

پڑے رہتے ہیں لاکھوں اُس کے در پر بے نوا مجھ سے

"Rahey Ga Mubtala e Kashmakash Insan Yahaan Kub Tak"A Beautiful Urdu Ghazal By Allama Semab Akbar Abadi

رہے گا مبتلائے کشمکش انساں یہاں کب تک؟

یہ مشتِ خاک پر جنگِ زمین و آسماں کب تک؟

یہ آوازِ درا بانگِ جرس، مہمل سے نغمے ہیں

چلے گا ان اشاروں کے سہارے کارواں کب تک؟

میں اپنا راز خود کہہ کر نہ کیوں خاموش ہو جاؤں؟

بدل جاتی ہے دنیا، اعتبارِ  راز داں کب تک؟

بقدرِ یک نفس غم مانگ لے اور مطمئن ہو جا

بھکاری! یہ مناجاتیں نشاطِ جاوداں  کب تک؟

"Paristar e Muhabbat Ki Muhabbat Hi Shariat Hai"A Beautiful Urdu Ghazal By Allama Semab Akbar Abadi

پرستارِِ محبت کی محبت ہی شریعت ہے

کسی کو یاد کر کے آہ کر لینا عبادت ہے

جہاں دل ہے، وہاں وہ ہے، جہاں وہ ہے، وہاں سب کچھ

مگر پہلے مقامِ دل سمجھنے کی ضرورت ہے

بہت مشکل ہے قیدِ  زندگی میں مطمئن ہونا

چمن بھی اک مصیبت تھا، قفس بھی اک مصیبت ہے

مری دیوانگی پر ہوش والے بحث فرمائیں

مگر پہلے انہیں دیوانہ بننے کی ضرورت ہے

شگفتِ دل کی مہلت عمر بھر مجھ کو نہ دی غم نے

کلی کو رات بھر میں پھول بن جانے کی فرصت ہے